Arrihet koalicioni për Prishtinën

Shpend Ahmeti do të përballet me Arban Abrashin e LDK-së në balotazhin e 19 nëntorit

Keystone EPA/VALDRIN XHEMAJ

Lëvizja Vetëvendosje dhe Aleanca Kosova e Re kanë arritur marrëveshje për garën e balotazhit të 19 nëntorit për të parin e Prishtinës, përcjell albinfo.ch.

Kryetari aktual i Prishtinës, Shpend Ahmeti dhe Selim Pacolli, janë shprehur të lumtur për arritjen e kësaj marrëveshjeje.

Ahmeti ka thënë se nuk është diskutuar për poste, por vetëm për programe dhe tashmë do të kenë më shumë asamblistë në komunën e Prishtinës, kurse i kënaqur ishte edhe Pacolli, i cili theksoi se do të punohet për të mirën e qytetarëve të Prishtinës.

Ahmeti do të përballet me Arban Abrashin e LDK-së në balotazhin e 19 nëntorit.

Në zgjedhjet lokale të mbajtura më 22 tetor, në raundin e parë Ahmeti mori 43.32 për qind apo 37572 vota, ndërsa Abrashi 35.89 për qind apo 31126 vota. Pacolli pati 10.40 për qind apo 9022 vota.