Numër shumë i vogël i grave që bëjnë biznes në Kosovë

Numri i grave në Kosovë, si në punësim e po ashtu në biznes, është shumë i vogël. Këtë e tregojnë hulumtime e shumta që janë bërë nga organizata që merren me barazinë gjinore.

Instituti Riinvest në tryezën me titullin “Ndërmarrësia e Grave”, ka prezantuar raportin e anketës me mbi 300 gra ndërmarrëse, nga ku ka dal se vetëm 10 për qind e grave në Kosovë bëjnë pjesë në biznes.

Drejtori Ekzekutiv i “Riinvestit”’, Alban Hasani deklaroi se këto fakte janë shqetësuese. Ai pohoi se bizneset në pronësi të grave i kushtojnë rëndësi  kapitalit njerëzor, përcjell albinfo.ch.

Ndërsa Lendita Kastrati nga Dhoma Ekonomike e Grave të Kosovës- G7,  foli për ambientin e vështirë në Kosovë për të bërë biznes gratë.

“Kostoja e financimit për gra mbetet ende një sfidë shumë e madhe përderisa kemi më pak se 10% të grave që marrin kredi në bankat komerciale. Kemi shumë pak rritje të bizneseve të grave, kemi një rritje shumë të vogël të grave të cilat angazhohen në bujqësi. Shumica e grave aty ku operojnë aty edhe shesin. S’kanë mundësi për të kaluar jashtë qytetit apo vendit se ku kanë biznesin e tyre”, theksoi ajo.