Dy aksidente me dy të vdekur në Pejë

Policia në Pejë njofton se në dy aksidente trafiku që kanë ndodhur mbrëmë në këtë qytet kanë vdekur dy të rinj, transmeton albinfo.ch.

Aksidenti i parë ka ndodhur rreth orës 22:45 në rrugën  “UÇK” në Pejë, në afërsi të palestrës së sporteve. “Në këtë aksident pos dëmeve të mëdha materiale shkaktohen edhe lëndime trupore, me ç’rast kanë pësuar gjashtë (6) persona, të cilët dërgohen në spitalin rajonal në Pejë dhe më pas dy (2) nga ta dërgohen  për në QKUK-Prishtinë, pasi që gjendja e tyre ishte e rënde sipas vlerësimit mjekësor, ku më pas policia është informuar se njëri nga personat e lënduar të dërguar në Prishtinë me inicialet D.R. (1992) kishte ndërruar jetë, dhe ky ishte si pasagjer në njërin nga automjetet e aksidentuara”, thuhet në njoftimin e policisë.

Ndërsa aksidenti i dytë ka ndodhur rreth orës 23:21 në afërsi të shkollës fillore në fshatin Gllogjan në Pejë, me ç’rast janë lënduar pesë (5) persona, të cilët janë dërguar në spitalin rajonal në Pejë dhe njëri nga ta i mitur ka arritur në spital pa shenja jete.

Policia thotë se ngasësi i veturës nga shpejtësia e madh ka humbur kontrollin dhe është vetëaksidentuar.

Me vendim të prokurorit të Shtetit viktima iu është liruar familjarëve, nuk është dërguar në autopsi, ndërsa të lënduarit tjerë janë ndaluar në spitalin rajonal në Pejë për trajtim mjekësor.

Policia apelon për shtim të vigjilencës gjatë drejtimit të automjeteve në trafik.