BE-ja s’pajtohet që Kosova të largohet nga CEFTA

BE-ja nuk po pajtohet me paralajmërimet e Kosovës që të largohet nga CEFTA për shkak të pranisë së UNMIK-ut në takime.

Zyra e BE-së ia ka përkujtuar Kosovës se rruga për në familjen evropiane kalon duke mbajtur marrëdhënie të mira fqinjësore, ndërsa çdo shqetësim rreth rregullave të kësaj marrëveshjeje duhet të zgjidhen përmes sekretariatit të CEFTA-s.

Mirëpo, Zyra e BE-së nuk i është përgjigjur pyetjes së KTV-së se kur Kosova do të përfaqësohet vetë, siç e parasheh marrëveshja e Brukselit, përcjell albinfo.ch.

Ministri i Tregtisë dhe Industrisë, Bajram Hasani, ka paralajmëruar mundësinë e largimit të Kosovës nga kjo marrëveshje dhe se një gjë të tillë do ta thotë edhe në takimin e radhës, që do të mbahet nga data 21 deri më 23 nëntor në Beograd, nga ku Kosova do ta marrë kryesimin e CEFTA-s.

Arian Zeka nga Oda Ekonomike Amerikane, e vlerëson të ngutshëm paralajmërimin e ministrit Hasani.