Skulpturë në Suedi për fëmijët e Kosovës

Skulptura „Gëzimi“ do të vendoset të martën në qytetin e Vasterasit të Suedisë, në shenjë kujtimi për viktimat e luftës në Kosovë

Skulptura i dedikohet Gëzim Dervishit nga komuna e Drenasit,  i cili në moshën 8 vjeçare ishte deportuar nga Kosova.

Ai gjatë luftës kishte kaluar nëpër kampet të refugjatëve në Suedi. Me skulpturën e Gëzimit do të përkujtohen fëmijët shqiptar që u vranë në luftën e Kosovës, dhe gjithë ata fëmije që u traumatizuan nga terrori i ushtrisë serbe.

 „Me këtë skulpturë paraqiten vuajtjet, persekutime duke treguar se cila është e vërteta për luftën e Kosovës, se nga kush janë vrarë dhe masakruar mijëra fëmijë, gra e pleq, se nga kush janë dhunuar mijëra vajza shqiptare, se nga kush janë dëbuar afër një milion shqiptarë nga Kosova”, thonë iniciatorët e përurimit të skulpturës në fjalë në qytetin e Vasterasit të Suedisë .

Historia me Gëzimin kishte filluar në vitin 2002, kur regjisori suedez Knutte Wester ishte zhvendosur me studion e tij nga veriu i Suedisë në një nga kampet refugjateve në pjesën qendrore te Suedisë. Atëbotë Gëzim Dervishi 8 vjeçar e vizitonte çdo ditë studion e artistit suedez.

Përjetimet gjatë luftës së Gëzim Dervishit ishin filmuar nga regjisori suedez, Knutte Wester.

Dokumentari i realizuar për Gëzimin, “Gëzim Rewind” është dokumentari me i suksesshëm,  dhe ka marrë shpërblime në disa festivale të filmit në Suedi.