Rrëmbehet zvicerania në Mali

Sipas informatave të medieve zvicerane, gruaja e kidnapuar ka punuar në Mali si misionare e krishterimit

Në veriun e shtetit afrikan Mali, persona të armatosur kanë kidnapuar një zvicerane 40 vjeçare. Ata thuhet të kenë hyrë në shtëpinë ku banonte gruaja, në Timbuktu dhe e kanë rrëmbyer atë. Rrëmbyesit kanë pasur turbanë në kokë, kanë thënë dëshmitarët për agjencinë e lajmeve Reuters.

Sipas informatave të medieve zvicerane, gruaja e kidnapuar ka punuar në Mali si misionare e krishterimit.

Departamenti i Punëve të Jashtme i Zvicrës (EDA) ka konfirmuar se është në dijeni për rastin. EDA është në kontakt me Malin por ende nuk mund të vërtetojë nëse ka ndodhur ose jo rrëmbimi.

Një muaj më parë pas 8 muajsh të kaluar si pengje në Pakistan, ishin liruar dy policë zviceranë, burrë e grua. Po kështu në muajin mars është rrëmbyer në Jemen një zvicerane, me profesion mësuese e gjuhës.