Zvicra kufizon ardhjen e emigrantëve

Qeveria zvicerane ka marrë vendim për kufizimin e lejeve të punës dhe qëndrimit për qytetarët e tetë vendeve anëtare të BE-së

Aktivizimi i “Klauzolës” në marrëveshje me BE-në, vlen për shtetasit e Republikës Çeke, të Estonisë, Letonisë, Lituanisë, Hungarisë, Polonisë, Sllovakisë dhe Sllovensë.

Një vendim i tillë i autoriteteve zvicerane do të zbatohet gjatë gjithë vitit.

Nga 1 maji  2011,  kur kuotat ishin hequr, qytetarët  e tetë vendeve të BE-së kanë gëzuar lirinë e plotë të lëvizjes në Zvicër.

Me marrëveshjen “Klauzolë” me BE-në ishte parashikuar që për lëvizjen e lirë të qytetarëve, Zvicra deri në vitin 2014 të ketë mundësinë të rivendos njëanshëm kuota për 8 vendet e BE-së.Qeveria zvicerane para 1 majit të vitit të ardhshëm do të marrë një vendim tjetër nëse do të zgjatet një masë e tillë edhe për një vit, deri në fund të majit të 2014-s.

Pas kësaj, vazhdimi do të jetë i pamundur, dhe liria e plotë e lëvizjes do të jetë e mundur për qytetarët e të gjitha 25 vendeve të BE-së.

Nga ana tjetër nuk kanë munguar kritikat nga Brukseli. Por, mediet zvicerane kanë hedhur poshtë mundësinë e hakmarrjes nga Bashkimi Evropian. Sipas tyre, Brukseli është interesuar më shumë të negocioj me Bernën.

Presidenti i Parlamentit Evropian, Martin Schulz e ka kritikuar vendimin e qeverisë zvicerane.

“Më vjen keq për vendimin e Zvicrës e cili diskriminon qytetarët e tetë shteteve anëtare të BE-së.. Qytetarët e BE-së që jetojnë në Zvicër janë të dobishme për ekonominë e vendit,” thuhet në një deklaratë të  Parlamentin Evropian.

Përfaqësuesja e Lartë e Bashkimit Evropian për Politika të Jashtme dhe të Sigurisë, Catherine Ashton,  ka kritikuar ashpër qeverinë zvicerane për rivendosjen e kufizimeve për disa kategori të lejeve të qëndrimit për shtetasit e tetë vendeve të BE-së.

“Kjo masë nuk është e justifikuar ekonomikisht, po as në tregun e punës, si dhe në numrin e qytetarëve të BE-së që kërkojnë vendbanim në Zvicër,” tha Ashton, transmeton Reuters.