Ndryshon rezultati në Istog, tash prin Haki Rugova i LDK-së

Nuk kanë kaluar as 12 orë nga shpallja e rezultateve preliminare, të cilat e nxirrnin kandidatin e AAK-së, Gani Dreshaj, fitues të zgjedhjeve në Istog me 52 vota më shumë dhe tash ka ndryshuar zyrtarisht rezultati, transmeton albinfo.ch.

Kandidati i LDK-së, njëherësh kryetari aktual i Istogut, Haki Rugova, është duke udhëhequr në garën për kryetar me 75 vota më shumë. Komisioni Qendror i Zgjedhjeve ka bërë të ditur për KTV-në se nga rezultatet e verifikuara të rivotimit në Istog,

Rugova prin me 75 vota më shumë sesa kandidati i AAK-së, Dreshaj, por nuk janë dhënë sqarime nëse ka pasur gabim në hyrje të të dhënave.

Koordinatori i Qendrës së Numërimit dhe Rezultateve, Burim Ahmetaj, ka thënë se numërimi i votave me kusht, atyre të personave me nevoja të veçanta dhe votave me postë do të nisë pasditen e sotme, ndërsa njoftoi se janë gjithsej 415 vota me kusht, 68 vota të personave me nevoja të veçanta dhe 28 vota me postë.

Numërimi i votave me kusht, postë dhe personave me nevoja të veçanta do të përcaktojnë fituesin e zgjedhjeve për kryetar të Istogut.