Arrestohet banori i Zvicrës, dyshohet për terrorizëm

Një banor i Zvicrës me prejardhje të huaj është arrestuar në Keni. I riu 19 vjeçar nga qyteti Biel-Bienne dyshohet për lidhjet e tij me milicinë fundamentaliste islame të Somalisë Al-Shabab, ka njoftuar Ministria e Punëve të Jashtme e Zvicrës.

Por autoritetet keniane ende nuk e kanë kontaktuar ministrinë zvicerane lidhur me rastin.

Sipas Zyrës Federale për Migracion, i arrestuari është një i ri i huaj që ka lejen e qëndrimit të përhershëm (C) në Zvicër.

Ndërkohë, i riu ka kontaktuar me mediet zvicerane dhe u ka thënë atyre se ai nuk është terrorist, siç e kanë etiketuar sipas tij mediet zvicerane. Përkundrazi, thuhet të ketë thënë ai. “Janë terroristët ata që më patën arrestuar”.