U protestua kundër ashpërsimit të Ligjit të Azilit

Protestuesve u janë bashkuar edhe 130 persona pa letra (Sans Papiers) të cilët janë duke marshuar nëpër Evropë

Rreth 5000 veta kanë protestuar të shtunën në Bernë kundër ashpërsimit që i është bërë javën e kaluar  Ligjit mbi Azilin. Sipas protesuesve, Zvicra është duke udhëhequr një politikë çnjerëzore të migracionit.

Protestuesve u janë bashkuar edhe 130 persona pa letra (Sans Papiers) të cilët janë duke marshuar nëpër Evropë, në kërkim të të drejtave të tyre. Në nisje të protestës, para Stacionit Hekurudhor të Bernës, para më shumë se 1000 vetave ka folur Emine Sariaslan në emrin e Forumit për Integrim të Migrantëve (FIMM).

“Ata që të huajve ua ngarkojnë njëanshëm përgjegjësinë për problemet me integrimin, i injorojnë pengesat të cilat u dalin në rrugë këtyre njerëzve”, ka thënë Sariaslan.

Kolona ka marshuar pastaj në drejtim të qytetit të vjetër dhe të sheshit federal (Bundesplatz). Në këtë pikë, numri i pjesëmarrësve në protestë ka arritur numrin prej rreth 5 mijë vetash.

Para kësaj mase ka folur deputeti nacional nga partia e Gjelbër Balthasar Glättli, i cili ka kritikuar vendimet e parlamentit për ashpërsimin e Ligjit të Azilit. Ai ka thënë se debatin për këtë ligj e ka përjetuar si tmerues.

Por, ka thënë ai: “ Ne e dimë se nuk duhet më mllef dhe frikë në këtë vend, por duhet guxim, më shumë besim dhe më shumë solidaritet . barka nuk është mbushur. Azilkërkuesit dhe refugjatët përbëjnë jo më shumë se 0.6 për qwind të popullatës.

Prandaj duhet të luftohet në mënyrë që ligji për azilin të ndryshihet ashtu që të plotësojë qëllimin e tij, pra, mbrojtjen e njerëzve të rrezikuar dhe jo frikësimin e tyre”, ka thënë Glättli.Protesta është thirrur nga organizata të ndryshme nga fusha e azilit dhe e të drejtave të njeriut, nga sindikata dhe parti.