Pushohet procedura ndaj Weltwoche-s: Nuk ka racizëm në fotografinë e Mentorit!

“As teksti dhe as fotografia nuk plotësojnë figurën e veprës penale të diskriminimit në bazë race”, ka konstatuar Prokuroria

Rasti i Mentorit, romit të vogël nga Gjakova, të pasqyruar në faqen e parë të javores “Weltwoche” nuk do të ndiqet penalisht. Këtë vendim e ka marrë Prokuroria e Përgjithshme e Cyrihut.

“As teksti dhe as fotografia nuk plotësojnë figurën e veprës penale të diskriminimit në bazë race”, ka konstatuar Prokuroria e Përgjithshme e Cyrihut lidhur me rastin.

Faqja e parë e javores zvicerane “Weltwoche” pati bërë bujë të madhe kur qe publikuar para sa muajsh. Ajo paraqiste një fëmijë rom i cili kishte drejtuar një revole-lodër në drejtim të kamerës. Në legjendën e fotografisë sugjerohej se “kështu edukohen romët që në fëmijëri për të ushtruar dhunë”.

Pasi qe zbuluar se Weltwoche këtë fotografi e kishte marrë nga një fotograf italian i cili kishte pasqyruar kushtet e rënda të jetesës së romëve në një lokalitet të Gjakovës. Ai atje kishte takuar Mentorin, atëbotë 4 vjeçar, të cilin e kishte fotografuar me revolen në fjalë.