Nga e premtja, vapë në Zvicër

Nga e premtja priten temperatura të larta që do të mund të arrijnë deri në 36 gradë mes ditës së diel dhe të hënës.

Që nga nesër në Zvicër koha do të jetë shumë e nxehtë. Kjo valë e vapës do të mund të zgjasë deri nga mesi i javës së ardhshme. Meteorologët nuk e përjashtojnë që kjo kohë të zgjasë deri në fund të javës. Temperaturat do të mund të arrijnë deri më 36 gradë celsius.

Erërat e nxehta nga Afrika e veriut dhe Spanja do të arrijnë të premten në Zvicër. Kështu që ajri i thatë dhe i nxehtë do ta vërshojë vendin, ka njoftuar «Météo suisse».

Veçse këtë të mërkurë vapa ka shënuar temperatura më të larta se 30 gradë, sikurse 33.3 gradë e regjistruar në Bazel.

Edhe pse të mërkurën në mbrëmje dhe të enjten ka pasur reshje si dhe një freskim të temperaturave, zhiva do të tregojë për të shtunën mes 31-34 gradë dhe do të ngjitet deri më 36 gradë të dielën (veçanërisht në Valis).

U rekomandohet personave të moshuar, grave shtatzëna dhe fëmijëve që të mos ekspozohen shumë gjatë këtyre temperaturave të larta.

Gjatë kohës së vapës specialistët rekomandojnë konsumimin e lëngjeve si dhe ushqimit sa më të lehtë.