Widmer-Schlumpf: Nuk rinegociojmë me Gjermaninë për tatimet

Zvicra ka negociuar një marrëveshje me Gjermaninë për tatimet. Propozimi tashmë është mbi tavolinë dhe nuk ka asgjë për të ndryshuar. Këto komente i ka bërë ministrja zvicerane e Financave, Eveline Widmer–Schlumpf, në një intervistë për SRF-në.

“Ne po diskutojmë për këtë marrëveshje dhe jo për ndonjë tjetër”, ka thënë presidentja e Konfederatës zvicerane.

Me gjithë kritikat e ashpra nga të dyja anët e kufirit, presidentja Eveline Widmer-Schlumpf beson ende në marrëveshjen për tatimet ndërmjet Gjermanisë dhe Zvicrës.

“Marrëveshja me siguri ka një shans, sepse është një zgjidhje e mirë dhe e vetmja që u mundëson të gjithë tatimpaguesve për t’i paguar tatimet e kaluara pa publikuar emra e tyre”, ka thënë Widmer-Schlumpf.