CVP-ja kërkon rikthimin e vizave për vendet e Ballkanit

Zyra Federale për Migracion (BFM) të martën ka bërë të qartë se kërkesat për azil nuk do të kenë shans, kryesisht për ata të komunitetit romë, nga shtetet e sigurta të Ballkanit, si Maqedonia, Serbia dhe Bosnjë e Hercegovina. Zyra Federale për Migracion tash e tutje do të japë një vendim për azil brenda 48 orëve për azilkërkuesit e këtyre vendeve.

Por kjo nuk mjafton për CVP-në. Alexandra Perina, sekretare e përgjithshme, kërkon rikthimin e regjimit të vizave për qytetarët e këtyre shteteve ballkanike, të cilat u lejuan të lëvizin në zonën Sehngen pa viza.

“Që prej kur këto vende janë përjashtuar nga regjimi i vizave, kërkesat për azil janë masive, edhe pse të gjitha këto tri vende konsiderohet të jenë të sigurta”, ka thënë Perina për Blick.

Por, nëse me rikthimin e regjimit të vizave do të dëmtohet turizmi zviceran. “Unë nuk mendoj se turistët janë grupet më të mëdha nga këto tri vende”, tha Perina.

Përjashtimi i vizave për qytetarët  e Ballkanit Perëndimor vlen që nga viti 2011. Përpjekjeve të BE-së për një integrim më të mirë i është bashkangjitur edhe Zvicra, si një anëtare e Shengenit, thotë Gaby Szöllösy, shef për komunikim në Zyrën Federale për Migracion. Zvicra gjithashtu ka mbështetur programe adekuate për përgatitjen e këtyre vendeve.

Në Zvicër jetojnë mijëra njerëz nga shtetet e lartpërmendura, të cilët kanë kontribuar për prosperitetin e Zvicrës, thotë Szöllösy. Për këta njerëz është një lehtësim i madh për t’i vizituar të afërmit e tyre në Zvicër.“Nëse Konfederata zvicerane kërkon përjashtimin e vizave për vendet e caktuara, atëherë do të duhet të heqim dorë edhe nga anëtarësimi në Shengen”, thotë Szöllösy.