Grubi: Lulzim Basha nuk ka qenë në shtëpinë e verdhë

"Mediat, KE dhe institucionet tjera nuk përfillin faktin që Tribunali i Hagës nuk gjeti asnjë dëshmi" ka thënë Artan Grubi

Artan Grubi, udhëheqës i organizatës “Zgjohu” doli sot me deklaratë në të cilën tregon se ka qenë ai shqiptari i vetëm që ka pasur mundësinë për të parë Shtëpinë e Verdhë, bashkë me një ekip të Hagës.

“Në javën e parë të muajit shkurt të vitit 2004, i ngarkuar me detyrë nga Tribunali i Hagës mora rrugën për në Shqipëri, bashkë me një roje nga Finlanda, me dy vetura diplomatike. Atje u takuam me shefin tonë, hetuesin e Tribunalit të Hagës i cili kishte arritur me aeroplan. Pastaj, në hotel u takuam me ekipin e mjekëve ligjorë të UNMIK-ut që udhëhiqej nga Jose Pablo Barybar. Më pas morëm rrugën për fshatin Gurrë ku gjetëm të ashtuquajturën “Shtëpinë e Verdhë” dhe vijuan hetimet gjatë gjithë ditës.”, ka thënë Grubi në një konferencë për shtyp.

Ai ka thënë se është absolutisht e pavërtetë se Ministri i Brendshëm Lulzim Basha ka qenë në fillim të shkurtit të vitit 2004 në fshatin Gurrë, duke qenë vetë Grubi i vetmi shqiptar, shoqërues i ekipit zyrtar të Tribunalit dhe UNMIKut.

“Aty ishin edhe familjarët e shtëpisë dhe prokurori shqiptar bashkë me shoqëruesit e tij. Po reagoj sot para jush duke parë që e gjithë kjo fushatë ka filluar me të pavërteta dhe duke parë që mediat, Këshilli i Evropës dhe institucionet tjera nuk përfillin faktin që ky hetim nga ana e Tribunalit të Hagës nuk gjeti asnjë dëshmi dhe rrjedhimisht nga mungesa e provave dhe dëshmitarëve nuk mund të ndërtohet rast siç ka cekur edhe vet kryehetuesi i Tribunalit për këtë rast në Maj të këtij viti për BBC-në. Edhe hetimet tjera, siç u raportua, përfunduan me të njëjtin rezultat”, ka thënë Grubi.