Agani, i gatshëm për bashkëpunim me Kuvendin Shqiptar

Agani u shpreh se me formimin e Kuvendit, është krijuar një mundësi që komuniteti shqiptar në Zvicër të përfaqësohet në mënyrë të drejtë

Kuvendi i Shqiptarëve të Zvicrës dhe Ministria e Shëndetësisë e Kosovës kanë mjaft hapësirë dhe potencial bashkëpunimi mes vete. Një konstatim i tillë del nga një komunikatë për medie, e dërguar nga Kuvendi, lidhur me takimin që ka pasur me ministrin e Shëndetësisë, Ferid Aganin.

Takimi është zhvilluar më 25 gusht 2012, në lokalet e Ambasadës së Kosovës, me  ç`rast një delegacion të kuvendit e ka kryesuar kryetari i tij, Jeton Kryeziu.

Gjatë takimit, përfaqësuesit e Kuvendit shprehë falënderimet për iniciativën e marrë nga ministri Agani, për tu takuar me këtë subjekt, thuhet më tutje në komunikatë.

“Kuvendi konsideron se kjo iniciativë është një hap me rëndësi të veçantë, si tregues për interesimin e institucioneve të Kosovës, për qytetarët e saj që jetojnë në Zvicër. Ministri Agani theksoi rëndësinë e një organizimi të tillë dhe njëherësh vlerësoi shumë punën e Kuvendit të Shqiptarëve të Zvicrës. Ai u shpreh se me formimin e Kuvendit, është krijuar një mundësi, që komuniteti shqiptar në Zvicër të përfaqësohet në mënyrë të drejtë.

Kuvendi i shpjegoi delegacionit të kryesuar nga ministri Agani, rëndësinë dhe peshën që ka marrë Kuvendi në shtetin e Zvicrës, i cili respektohet dhe perceptohet ngaorganet shtetërore zvicerane, si subjekt i vetëm i tillë i komunitetit shqiptar në Zvicër. “Ky respekt dhe perceptim, mjerisht, ka munguar deri më tani ngaana e autoriteteve të Kosovës”, thuhet në komunikatë.

Në këtë takim, Kuvendi paraqiti ide konkrete, se ku mund të ketë bashkëpunim  me institucionet e Kosovës.  Ndër të tjera ai propozoi që Ministria e Shëndetësisë e Kosovës të përpilojë një studim në lidhje me sëmundjet që mund të trajtohen në Kosovë dhe ato të cilat nuk mund të trajtohen. Mbi bazën e këtij studimi të krijohen mundësi për të ndihmuar bashkatdhetarët tanë, të cilët nuk kanë leje qëndrimi të përhershëm në Zvicër. Qëllimi i këtij projekti është që ata persona të qëndrojnë në Zvicër për tu trajtuar dhe pastaj, pas trajtimit mjekësor, kthimi të ndodhë sipas normave përkatëse.

Në komunikatë theksohet gjithashtu se Kuvendi kërkoi nga Ministria e Kosovës që të mundësohet një bashkëpunim ndërmjet shërbimeve shëndetësore të Kosovës dhe kompanive të sigurimeve në Zvicër. Përmes një marrëveshjeje të tillë institucionale, bashkatdhetarët tanë në Zvicër do të kurseheshin nga problemet me pagesa pas ndonjë trajtimi mjekësor gjatë qëndrimit në Kosovë.

Kuvendi po ashtu i propozoi ministrit Agani bashkëpunim me një klinikë me reputacion të madh në Lozanë, e cila ka shprehur gatishmërinë e saj në këtë drejtim.

Mysafiri i lartë nga Prishtina u shpreh shumë i gatshëm për një bashkëpunim të tillë. Ai ka marrë në konsideratë të gjitha kërkesat, por edhe vullnetin etreguar nga Kuvendi për një bashkëpunim sa më të frytshëm në mes veti, thuhet veç  tjerash në një komunikatë të dërguar nga Kuvendi i Shqiptarëve të Zvicrës.