Policia mohon se është gjetur trupi i policit tjetër

Policia e Kosovës, ka mohuar lajmin se është gjetur trupi tjetër i policit, Armend Trena.

Zëdhënësi i Policisë së Kosovës për rajonin e Ferizajt, Agim Gashi, ka thënë për mediat vendore se janë duke kërkuar, por sot, nuk kanë gjetur asnjë trup, përcjell albinfo.ch.

Sot më herët është raportuar në disa medie për gjetjen e trupit të Armend Trenës.

Në ndërkohë sot në fshatin Stagovë të Kaçanikut i është dhënë lamtumira e fundit policit Malsor Dashi, trupi i të cilit u gjet dje në lumin Lepenc pas katër ditësh kërkime.

Policët Malsor Dashi dhe Armend Trena u zhdukën pas aksidentit të së shtunës mbrëma në rrugën Kaçanik-Hani i Elezit.