Policia konfirmon vdekjen e shtetasit të Kosovës në Shqipëri

Policia e Kosovës ka konfirmuar se personi i djegur në një veturë në Fushë-Krujë është Xh.O., shtetas i Kosovës, 57-vjeçar.

Sipas zëdhënësit të Policisë për rajonin e Mitrovicës, Avni Zahiti, ky person është raportuar nga familjarët si i zhdukur dhe sipas Policisë shqiptare, dyshimet e para janë se bëhet fjalë për të.

“Ne do të bashkëpunojmë me Policinë shqiptare dhe varet se çfarë informata do të kërkojë Prokuroria, ne do t’ua ofrojmë”, ka thënë Zahiti për KTV-në, përcjell albinfo.ch.

Shtetasi i Kosovës është gjetur i djegur në një veturë të shtunën pasdite dhe kjo veturë kishte hyrë në Shqipëri pesë ditë më parë.

Policia ende nuk ka dhënë zyrtarisht ndonjë arsye të këtij krimi, por dëshmitarët kanë thënë se në ulëset e para të veturës kanë parë një person tjetër, e viktima mendohet se ka qenë i lidhur prapa.