Kosova, në festivalin ndërkombëtar të koreve botërore në Francë

Kori i qytetit të Pejës “Siparantum Choir” ka udhëtuar për në Nancy të  Francës, ku pritet të marrë pjesë në festivalin ndërkombëtar të koreve botërore “Nancy Voix Du Monde 2018″ që mbahet nga data 9-13 maj.

Kori do të paraqitet me disa koncerte në lokacionet më të njohura si: Temple à NANCY, la salle Erkman à LUNEVILLE, Grand Salon de NANCY dhe Place Stanislas à NANCY, ku në këtë mbrëmje do të paraqitemi bashkë me Algjerinë, Gjermaninë, Argjentinën, Bullgarinë, Kilin, Ekuadorin, Filipinet, RD e Kongos, R. Çeke, Zvicra, Ukraina, etj, përcjell albinfo.ch.

“Për këtë program ne jemi duke punuar gjatë dhe intensivisht dhe ja, mundi u shpërblye. Edhe pse kori është formuar vitin e kaluar, konsideroj se kemi bërë një punë të madhe dhe e gjithë kjo në baza vullnetare vetëm për të pasuruar kulturën dhe vlerat tona. Për këtë gjë u jam falënderues të gjithë atyre që na kanë përkrahur drejt qëllimeve tona artistike. Shpresoj që do të kthehemi me paraqitjet tona më të mira nga Franca”, ka thënë kreu i korit, Fatmir Bajraktari.

Kori “Siparantum” do të paraqitet me vepra të kompozitorëve të njohur botërorë dhe vendorë, si: Whitacre, Bartolucci, Runestad, Gjeilo, M. Mengjiqi, K. Aliçkaj, D. Zeqiri-Nushi, M. Kelmendi, etj. Pjesëmarrja e shtetit të Kosovës në këtë festival është përcjellë nga media të shumta franceze.