Mbahet Kuvendi për Zvicrën Lindore

Me këtë rast do të zgjidhen përfaqësuesit e këtij regjioni në strukturat e Kuvendit të Shqiptarëve të Zvicrës

Në një njoftim drejtuar medieve, Kuvendi i Shqiptarëve në Zvicër bën të ditur se, në vazhdën e konsolidimit të tij, do të mbajë kuvendin regjional për Zvicrën Lindore. Siç kemi informuar me kohë, Kuvendi, në muajin qershor pati mbajtur mbledhjen themeluese në nivel qendror, me ç`rast kishin mbetur pa u përfshirë dy regjione: Zvicra lindore dhe kantoni Ticino.

“Gjatë muajve maj dhe qershor 2012, Kuvendi i Shqiptarëve të Zvicrës ka mbajtur kuvendet regjionale në pesë regjione të Zvicrës duke përfshirë kështu të gjitha kantonet, përveç Zvicrës lindore dhe Kantonit Ticino. Për ta rrumbullakësuar këtë proces, më 16 shtator mbahet Kuvendi regjional i Zvicrës Lindore ku do të zgjidhen përfaqësuesit e këtij regjioni në strukturat e Kuvendit të Shqiptarëve të Zvicrës”, thuhet në njoftimin e Kuvendit Shqiptar.

Në kuvend do të prezantohen aktivitetet e deritashme, vizionet, pastaj do të bëhet zgjedhja e përfaqësuesve të këtij regjioni për Kuvendin qendror.

Kuvendi mbahet të dielën, më 16 shtator 2012, nga ora13 deri në orën 15, në Restaurant Cocco Bello, St. Georgenstrasse 157, 9000 St. Gallen. Sponsor i këtij takimi është Sokol Nitaj, Neks Versicherungen GmbH, thuhet në njoftimin e dërguar nga Grupi organizues për Zvicrën lindore, Jeton Kryeziu & Nazmi Jakurti.