Kancelarja Merkel porosit kosovarët ta luftojnë korrupsionin

Keystone (AP Photo/Michael Sohn)

Kancelarja gjermane Angela Merkel në konferencën e përbashkët që ka pasur me presidentin e Kosovës, Hashim Thaçi ka bërë thirrje që Kosova ta luftojë korrupsionin dhe ta ulë papunësinë, derisa ka shtuar se dialogu me Serbinë nuk është temë e thjeshtë.

“Kemi shumë probleme të pazgjidhura, por ka edhe përmirësime në rrugën drejt BE-së. Dua të theksoj se në ditën e Evropës kemi shumë sfida para nesh, sfida që na presin, e që janë luftimi i korrupsionit, numri i lartë i papunësisë”, ka shtuar ajo, përcjell albinfo.ch.

Merkel ka bërë thirrje që marrëveshjet e arritura deri tash në dialog të zbatohen, por nuk ka përmendur liberalizimin e vizave.

Presidenti Thaçi, deklaroi se Kosova është e përkushtuar për paqe dhe stabilitet në Ballkanin Perëndimor dhe integrim në BE.

Thaçi theksoi se Kosova dhe Serbia duhet t’i normalizojnë raportet ndërshtetërore dhe të implementohen të gjitha marrëveshjet e arritura në Bruksel.

Presidenti tha se faza përfundimtare e dialogut nuk do të jetë e lehtë as për Kosovën dhe as për Serbinë, duke shtuar se nuk ka rrugë tjetër për të ecur përpara përveç dialogut dhe marrëveshjes.