Gjenevë : Portugezët kërkojnë lëndë mësimi në gjuhën e tyre

Një peticion i komunitetit portugez kërkon ligjërimin fakultativ të portugalishtes në shkollat e mesme

Të premten në mbrëmje, në Grande-Lancy në Gjenevë komuniteti portugez ka bërë një hap të guximshëm me lansimin e peticionit «Për kyçjen e portugalishtes në mësimin postobligativ gjenevas». Ky tekst është një i paparë deri tani, tashmë i mbështetur nga partitë politike të majta si dhe nga sindikata Unia, njofton e përditshmja «20 Minutes».

10% e nxënësve

«Ne jemi kantoni ku ka më së shumti portugezë në Zvicër, ose afro 50.000 persona», shpjegon Carla Rocha, presidente e Shoqatës së prindërve dhe nxënësve portugezë. Fëmijët tanë paraqesin 10% të nxënësve dhe ne dëshirojmë t’u japim atyre mundësinë që ta mësojnë gjuhën e tyre, sikurse spanjollët apo rusët, në disa shkolla».

«Pse jo shqipen?»

Në muajin prill, gjatë fushatës së tij, këshilltari shtetëror aktual, Pierre Maudet, e pati mbrojtur idenë. Mirëpo, kjo ide si duket nuk gëzon pëlqimin e partisë, e cila gjendet në krahun më të djathtë të Gjanevës, atë të Lëvizjes qytetare gjenevase (Mouvement Citoyens Genevois – MCG).

«E pse jo atëherë edhe mësim në gjuhën shqipe apo serbe, pasi që jemi deri aty! Unë jam totalisht kundër këtij propozimi», ka thënë Carlos Medeiros, i cili është me prejardhje portugeze si dhe Këshilltar komunal i dalë nga MCG. Sipas tij, «kjo është hapje ndaj rrëshqitjeve komunitariste [lexo etnike]. Vetëm tri gjuhët kombëtare duhet të mësohen», ka thënë ai.

Dorëzuesit e peticionit kanë afat deri më 15 nëntor për t’i mbledhur nënshkrimet e nevojshme.

Së fundi, vlen të përmendet se lexuesit e mediumit të sipërpërmendur kanë reaguar vrullshëm me komente të shumëllojta, madje edhe me të karakterit të hapur racist. Karshi numrit të madh të reagimeve si dhe përmbajtjes së tyre, hapësira e komenteve është mbyllur.

Në fillim të portalit tonë ne e patëm botuar një kronikë të një lexueseje, e cila propozonte të futet gjuha shqipe si gjuhë fakultative në gjimnaze. Prandaj, pyetja e sondazhit tonë që u drejtohet lexuesve të albinfo.ch është: