Dramaturgu Jeton Neziraj shpallet “Evropiani i vitit”

Dramaturgu kosovar, Jeton Neziraj, është shpallur “Evropiani i vitit” për 2018-ën, si individi që ka promovuar idenë dhe vlerat evropiane më së miri në Kosovë.

Ky çmim iu nda nga Zyra e Bashkimit Evropian në Kosovë. Këtë çmim Nezirajt ia ndau Majlinda Kelmendi, që ishte e para që u nderua me këtë çmim para tre vjetësh, përcjell albinfo.ch.

Në ceremoninë e ndarjes së këtij çmimi u theksua, ndër të tjera, se Kosova ka bërë progres të mirë në rrugën e saj drejt integrimeve evropiane, porse ka ende shumë punë për të  bërë, sidomos në sundimin e ligjit. Shefja e zyrës së Bashkimit Evropian në Kosovë, Natalya Apostolova, tha se po shënojnë punë jashtëzakonisht të madhe që BE-ja po bën në Kosovë.

Apostolova tha po ashtu se proceset integruese evropiane kanë bashkuar 28 shtete anëtare dhe përmes tyre 510 milionë njerëz, duke bërë kështu që ideja e konflikteve përbrenda fuqive evropiane tani të jetë diçka që as nuk mendohet.