Kompania nga Polonia e interesuar për sektorin e minierave të Kosovës

Ministri i Diasporës dhe Investimeve Strategjike, Dardan Gashi, ka pritur një delegacion të kompanisë Luma Investment – E&E Experts, e cila për momentin në Kosovë është duke kryer hulumtime për plumb dhe zink në katër zona, transmeton albinfo.ch.

Kompania ka shprehur interesim që të zgjerojë aktivitetet në Kosovë në fushën e minierave, duke u kualifikuar si investitor strategjik në këtë fushë.

Në prezantimin e kësaj kompanie, Aleksandra Chloewa, drejtoreshë e Investimeve e kompanisë, informoi për operacionet të cilat momentalisht i kanë në Bosnjë, Kosovë, Afrikë e Poloni.

Gashi i informoi delegacionin nga Polonia për ndryshimet të cilat do t’i bëhen Ligjit për investime strategjike në sektorin e minierave ashtu që ai të jetë akoma më i mirë për kompanitë e mëdha që vijnë në Kosovë me projekte serioze.

“Ne jemi duke e përmirësuar legjislacionin. Tani po presim që të miratohet ligji i ndryshuar për minierat i cili do të reflektojë mbi boshllëqet e lëna në ligjin për investime strategjike posaçërisht në fushën e minierave, për ta bërë procesin akoma më të lehtë dhe më të favorshëm për kompanitë serioze që shprehin interesim për të investuar”, tha Gashi.