Udhërrëfyesi “Të jesh i moshuar në Zvicër”, edhe në gjuhën shqipe

Emigrantët e moshuar në krahasim me moshatarët zviceranë, është më dobët e informuar lidhur me masat për mbrojtjen e shëndetit

Kryqi i Kuq i Zvicrës ka botuar një doracak – udhërrëfyes për migrantët e moshuar. Udhërrëfyesi është botuar në tetë gjuhë, në mesin e të cilave edhe në gjuhën shqipe. Të huajt e parë, të cilët në Zvicër kishin ardhur në vitet 60 të shekullit të kaluar, sot kanë mbërritur në moshën e pensionimit. Rreth një e treta e tyre, edhe pse shpesh në kundërshtim me atë që kanë planifikuar, e kalon etapën e fundit të jetës në Zvicër. Kjo kategori njerëzish, në krahasim me moshatarët e tyre zviceranë, është më dobët e informuar lidhur me masat për mbrojtjen e shëndetit dhe për ofertat e kujdestarisë për të moshuar siç janë Spitex dhe shtëpitë e pleqve. Ndër shkaktarët për këtë pabarazi janë edhe barrierat gjuhësore , të cilat kufizojnë qasjen e tyre ndaj ofertave ekzistuese.  Kantonet dhe komunat, në bazë të ligjit, janë të detyruara që t`i informojnë të huajat dhe të huajt në lidhje me të drejtat dhe detyrimet e tyre . kjo nënkupton që institucionet shëndetësore dhe sociale t`ua bëjnë më të afërta ofertat e tyre edhe të huajve të moshuar për të evituar kështu barrierat  e qasjes. Në këtë kontekst, udhërrëfyesi shëndetësor me 60 faqe “Të jesh i moshuar në Zvicër” pritet të japë një kontribut të rëndësishëm. Ai është botuar në tetë gjuhë të ndryshme nga Kryqi i Kuq i Zvicrës dhe Enti Federal për Shëndetësi, ndërsa mund të shkarkohet falas në internet.  Ky udhërrëfyes, krahas këshillave praktike dhe informacioneve, përmban edhe adresat e qendrave këshillimore për njerëzit e moshuar. Kështu, në kapitullin për shëndetësi trajtohen aspekte të të ushqyerit ose të lëvizjes, sëmundje specifike të moshës si demenca, depresionet ose edhe sëmundjet e varësisë. Po ashtu në libër përfshihen edhe informacione lidhur me të drejtat dhe detyrimet e pacientëve. Në kapitujt tjerë ndriçohen çështje të sigurimit, aspektet juridike të moshës së pensionimit, format e jetës dhe banimit në rastet e të moshuarve me nevoja për kujdes intensiv. Udhërrëfyesi i ri është realizuar në kuadrin Programit Nacional për Migracion dhe Shëndetësi. Ai është në dispozicion në gjuhët si: shqip, gjermanisht, frëngjisht, italisht, bohnjakisht/kroatisht/serbisht, portugalisht, spanjisht dhe turqisht.

Udhërrëfyesi mund të shkarkohet gratis në këtë adresë: www.migesplus.ch