Fëmijët, më shumë shanse për të jetuar

Fëmijët në mbarë botën gjithnjë e më shumë po arrijnë të mbijetojnë ditëlindjen e tyre të pestë, raporton UNICEF

Megjithatë për shkak të kushteve të këqija, shumë foshnje vdesin në muajin e parë. Çdo vdekje e tretë është për shkak të mungesës së ushqimit.

Numri i fëmijëve që vdesin para moshës 5-vjeçare ka qenë në rënie të vazhdueshme gjatë dy dekadave të fundit, vlerëson Agjencia për Fëmijë e Kombeve të Bashkuara UNICEF në raportin për vitin 2012.

Të dhënat e publikuara të enjten nga UNICEF-i tregojnë se shifra globale ka rënë nga 12 milionë, sa ka qenë në vitin 1990, në 6.9 milionë më 2011.

Si shkaqe të reduktimit të vdekjeve, raporti përmend ndihmat që kanë inkurajuar ushqimin me gji dhe imunizimin kundër sëmundjeve të zakonshme.

Megjithatë, pavarësisht miliona jetëve të shpëtuara, gati 19 mijë fëmijë nën 5 vjeç vdesin çdo ditë nga sëmundjet që mund të parandalohen.