Shqiptarit, 7 vjet burg për therje të zviceranit

Se a do të dëbohet nga Zvicra Rasim R., do të vendosë më vonë Zyra për Migracion

Rasim R., shqiptari që ka therur mundësinë zviceran Kari Zingrich, është dënuar sot me 7 vjet heqje lirie. Duke shqiptuar këtë dënim, gjykata regjionale e Thunit ka ndjekur plotësisht palën paditëse, e cila kishte kërkuar po ashtu 7 vjet burg për tentim vrasjeje të qëllimtë, me ç`rast të dëmtuarit i janë shkaktuar plagë të rrezikshme për jetë. 

Rasti i plagosjes së ish sportistit dhe politikanit lokal të SVP-UDC-së kishte ndodhur më 15 gusht të vitit të kaluar. Ai i kishte shërbyer pastaj kësaj partie për të zhvilluar një fushatë, ku kishte rënë në sy veçanërisht afishja me tekstin “Kosovarët therin zviceranët”.

Duke u përgjigjur para trupit gjykues, Rasim R. ka theksuar se i vjen keq për ngjarjen.  Sipas tij, ditën kur ka ndodhur krimi ai dhe vëllai kishte pasur një shkëmbim fjalësh me dy zviceranë në kopshtin e një restoranti në Interlaken. Kur mundësi Zingrich ishte ngritur, ky kishte pasur frikë se po ia sulmonte vëllanë dhe kishte bërë përpjekje ta mbronte atë.

Edhe mbrojtësi (për nga detyra zyrtare) ka pohuar se Rasimi e ka kryer sulmin duke qenë në lajthitje. Sipas tij, për këtë vepër penale masa ndëshkuese adekuate do të ishte 3 vjet, prej të cilave gjysma  me kusht.

Ndërsa prokuroria kishte ngulur këmbë se sulmi ishte bërë me qëllim të vrasjes kështu që dënimi meritor do të ishte ai prej 7 vjet burg.