Në Shqipëri të hyra direkte 1 miliard dollar për vitin 2018

Ministri i Financave dhe Ekonomisë, Arben Ahmetaj ka deklaruar gjatë ditës së sotme se  investimet e huaja direkte pritet të arrijnë vlerën e rreth 1 miliard dollarëve për vitin 2018.

Në mbledhjen e Këshillit të Investimeve që zhvilloi sot punimet në Tiranë, ministri Ahmetaj foli për statistikat e Bankës së Shqipërisë dhe investimet e huaja, shkruan Albinfo.ch.

“Investimet e huaja direkte shënuan vlerën e 284 milionë eurove, shifër kjo që rezulton me rritje vjetore prej 62% ose në nivelin më të lartë të 8 viteve të fundit”, deklaroi Ahmetaj.

Investimet e huaja për vitin 2017 llogariten 907 milionë euro.

Ahmetaj tregoi se deri në vitin 2013 ishte një model ekonomik i bazuar te konsumi dhe remitancat, si burimi kryesor i të ardhurave nga jashtë, një model ekonomik që, sipas tij, dukshëm i kishte konsumuar kapacitetet e veta dhe nuk prodhonte më punësim.

“Përveçse rritja ekonomike është katërfishuar, investimet e brendshme dhe të huaja janë kthyer në dy nga gjeneratorët e rritjes”, deklaroi kreu i financave publike.