Preteni: Asnjë institucion nuk ka qenë imun ndaj korrupsionit

Qytetari i Kosovës ka pritur më shumë angazhim në luftën kundër korrupsionit gjatë vitit 2010

Kosova ka hyrë në vitin 2011 me nivel të lartë korrupsioni, thonë përfaqësues të Agjencisë Anti-Korrupsion. Drejtori i këtij organi, Hasan Preteni  thotë për radion Evropa e Lirë se asnjë nga institucionet kosovare nuk i ka shpëtuar përfshirjes në vepra korruptive. Ai nuk shprehet i kënaqur me rezultatet e luftës kundër korrupsionit.

“Korrupsioni në Kosovë është ende i pranishëm në masë shqetësuese. Qytetari i Kosovës ka pritur më shumë punë në luftën kundër korrupsionit gjatë vitit 2010. Kemi menduar se institucionet, që kanë për qëllim luftimin e kësaj dukurie, do të punojnë më shumë”, thotë Preteni. Në 2010-ën, sektori më i korruptuar raportohet të ketë qenë ai i partive politike, i dyti, sektori i gjyqësorit.

Preteni kritikon sistemin e drejtësisë për mosshqyrtimin e lëndëve që kanë të bëjnë me korrupsionin. “Gjyqësori duhet të tregojë përse mungojnë rezultatet”, ka thënë ai.