Zvicra, me klauzolë kundër abuzimit me vizat

Një klauzolë e tillë do të nënkuptonte që detyrimi për vizë të vihet sërish për vendet e treta, nëse paraqitet e domosdoshme

Pas rasteve të shumta të keqpërdorimit të të drejtës së fituar për udhëtim pa viza në vendet e Shengenit, disa nga shtetet e BE-së janë duke kërkuar marrje masash ndaj 5 vendeve të Ballkanit. “Po vjen duke u rritur presioni për të futur në fuqi një klauzolë mbrojtëse lidhur me vizat”, ka thënë ministrja federale e drejtësisë, Simonetta Sommaruga.Ajo ka marrë pjesë në margjina të bisedimeve të zhvilluara sot (e enjte) në këshillin e ministrave të brendshëm të shteteve anëtare të Bashkimit Evropian, në Luksemburg. Një klauzolë e tillë do të nënkuptonte që detyrimi për vizë të vihet sërish për vendet e treta, nëse paraqitet e domosdoshme. Sommaruga është shprehur se është e rëndësishme që të kihet në dispozicion një instrument i tillë.Njësoj mendon edhe ministrja austriake e drejtësisë Johanna Mikl-Leitner. Ajo ka thënë se është jashtë çdo dyshimi që vënia e një klauzole mbrojtëse do të ishte një masë e rëndësishme dhe e duhur. Ka njerëz që vijnë këtu (në vendet e BE-së) me qëllimin e qartë që të përfitojnë materialisht dhe pastaj ta lëshojnë vendin. Këtu bëhet fjalë para së gjithash për romët. Ministrja Sommaruga ka informuar ministrat e vendeve të Schengenit lidhur me masat që ka marrë Zvicra ndaj azilkërkuesve nga shtetet e Ballkanit, të konsideruara prej kohësh si “vende të sigurta” respektivisht ku nuk ka ndjekje të njerëzve nga autoritetet shtetërore. Shpejtimi i procedurës së azilit për njerëzit nga tri vendet e Ballkanit, të liruara nga detyrimi i vizave, ka dhënë efektet e veta, ka thënë ajo. Ndërkaq ministri gjerman i punëve të brendshme Hans-Peter Friedrich, duke folur për masat që duhet ashpërsuar ndaj azilkërkuesve nga Serbia dhe Maqedonia, i ka cilësuar procedurat e shpejta zvicerane si shembull. Por, ai ka nënvizuar se një procedurë e tillë prej vetëm 48 orësh që po e aplikon tashmë Zvicra, nuk do të ishte e mundur të zbatohej në Gjermani për shkak të afateve ekzistuese për ankesë.