Sezoni turistik sjell një ekuilibër të ri të kursit të lekut

Që në fillim të muajit qershor e deri në fund të këtij muaji, ka një lloj stabilizimi në tregun valutor, si rezultat i disa ndërhyrjeve të Bankës së Shqipërisë

Pas ndërhyrjeve të Bankës së Shqipërisë për të frenuar rënien e monedhës euro në këmbim me lekun, duket se do të jetë sezoni turistik ai që do të sjellë një ekuilibër të ri në kursin e këmbimit valutor në vendin tonë.

Elvin Meka ekonomist për çështjet bankare, u shpreh për ATSH-në, se që në fillim të muajit qershor e deri në fund të këtij muaji, ka një lloj stabilizimi në tregun valutor, si rezultat i disa ndërhyrjeve të Bankës së Shqipërisë, duke e sjellë në një ekuilibër më të qetë ose në luhatje të vogla 0,2 lekë, që janë normale në aktivitetin e përditshëm të shkëmbimit të monedhave në treg.

Ajo që mbetet për t’u parë, thekson Meka, është si do të reagojnë tregjet dhe institucionet kryesisht në sezonin veror që shënon pikun në këto dy muaj të vitit, (korrik, gusht) ku Shqipëria historikisht regjistron fluksin më të lartë të monedhave të huaja.