Sommaruga, shqiptarëve: “Mësojeni gjuhën!”

“Duke mësuar gjuhët e vendit, shqiptarët do të integrohen më mirë dhe problemet do të reduktohen”, thotë ministrja Sommaruga për albinfo.ch

Në takimin “Dialogu i integrimit dhe bota e punës” që u mbajt të martën në Bernë ka marrë pjesë edhe ministrja e drejtësisë në Qeverinë e Zvicrës, Simmonetta Sommaruga. Në një bashkëbisedim të shkurtë për albinfo.ch, ajo ajo ka folur edhe për imazhin e shqiptarëve në Zvicër.

E lutur që të flasë lidhur me karakterin e këtij takimi, nëse ai paraqet një kthesë në debatet për integrimin ose është vetëm vazhdimësi e tyre, Sommaruga thotë: Ka qenë një aktivitet shumë i rëndësishëm pasi që sot politika, ekonomia, shoqëria civile, shoqatat, të gjitha janë bërë bashkë dhe janë pajtuar me qëndrimin se integrimi është shumë i rëndësishëm për të gjithë. Të gjithë këta aktorë ishin të pajtimit se integrimi patjetër do të funksionojë nëse të gjithë angazhohen në këtë drejtim, në bashkëveprim njëri me tjetrin”.

Mësimi i gjuhëve të vendit është me rëndësi bazike për të huajt, andaj edhe për shqiptarët në Zvicër, ka thënë Sommaruga, e pyetur nga albinfo.ch për imazhin e shqiptarëve në Zvicër.

“Më e rëndësishmja për të gjitha grupet e huaja në Zvicër është që të mësojnë gjuhët e vendit. Me këtë veprim ata mund të komunikojnë dhe shkëmbejnë me të tjerët. Kështu do ta kuptojnë njëri tjetrin. Unë besoj se edhe për shqiptarët është shumë me rëndësi që të mund të flasin njërën nga gjuhët nacionale. Në atë rast ata mund të komunikojnë dhe kështu për ta do të jetë më e lehtë të gjejnë një vend të punës. Në këtë mënyrë shqiptarët do të jenë të integruar mirë dhe rrjedhimisht, problemet për të cilat flitet do të jenë të reduktuara në masë të madhe.”