Për shkak të dëshmive të rreme, humbasin lejeqëndrimin

Vendet e Bashkimit Evropian iu kanë dërguar autoriteteve kosovare rreth 11 mijë raste për verifikim të shtetësisë

Për shkak të deklarimit të rremë, qindra qytetarë nga të gjitha nacionalitetet e vendeve ballkanike, po e humbasin leje-qëndrimin(lejeqëndrimi) nëpër shtetet e Bashkimit Evropian. Pas verifikimit të të dhënave, shumë nga ata që kanë marrë azilin në BE, por edhe ata që po tentojnë të fitojnë aktualisht, po zbulohen si gënjeshtarë dhe po kthehen në atdhe.Sipas një raporti që ka publikuar RTK, vendet e Bashkimit Evropian po vazhdojnë t’u dërgojnë autoriteteve në Kosovë lista azilkërkuesish kosovarë për të vërtetuar shtetësinë e tyre. Ndërsa pas procesit të verifikimit të dëshmive të kërkesës për azil me gjendjen në terren, thuhet se qindra raste kanë dalë te rreme.Blerim Camaj është shef i Agjencisë së Regjistrimit Civil të Kosovës. Ai tha se mijëra raste kanë rezultuar të rreme, pas verifikimit të të dhënave. ”Në ato shtete ku është kërkuar azili kanë kërkuar përmes ambasadave të tyre verifikimin e këtyre tek Agjencia jonë. Ne kemi dalë në terren dhe kemi verifikuar dhe fatkeqësisht ka rezultuar se ata janë shtetas të shteteve përreth, Shqipërisë, Maqedonisë, Serbisë”, ka thënë Camaj.Sipas tij, shumica e këtyre personave sipas informatave po i kthejnë në vendet e tyre pavarësisht statusit të tyre të rregulluar. “Krejt këto njoftimet tona që ua dërgojmë se nuk janë shtetas të Kosovës ua prishin shtetësinë dhe i kthejnë”, ka thënë Camaj, sipas të cilit autoritetet kosovare kanë konfirmuar numrin prej 11 mijë kërkesash për verifikim.