Opozita përplaset në Kuvend për dialogun

Kryeministri i Kosovës, Ramush Haradinaj, në debatin për dialogun me Serbinë u ka bërë thirrje deputetëve të Kuvendit që ta marrin procesin e dialogut në dorë, siç tha “që të mos vendosin të tjerët për ne”.

Kryeministri tha se kontributi i të gjithë deputetëve është i nevojshëm në këtë debat.

“Ajo që dua të ju lus është që mos e harroni këtë, që një temë e vendit tuaj mund të shtrohet në tavolinat e vendimmarrjes edhe pa kontributin tonë. Ajo që ka bërë parlamenti në të kaluarën nuk është për dialogun që vjen. Merreni në dorë procesin e dialogut si parlament, ka mjaftë rezoluta dhe kontribute”, ka thënë Haradinaj, përcjell albinfo.ch.

Deputeti i Lëvizjes Vetëvendosje, Liburn Aliu ka kundërshtuar rezolutën e PSD-së për dialogun me Serbinë. Ai tha se duhet treguar se për çka konkretisht do të bisedohet në dialog.

Ndërsa sipas deputetit Visar Ymeri, një diskutim i tillë tregon sa e rëndësishme është që Kuvendi ta shkruajë platformën e strategjinë, që siç tha ai kjo mos t’i lihet një grupi të vogël njerëzish, apo Thaçit.

Ymeri tha se është e rëndësishme të testohet LDK-ja  në fillim të procesit e jo në fund.

Ndërsa Avdullah Hoti në replikën e tij tha se me rezoluta të tilla nuk shkohet askund, dhe se nuk ka parti në Kuvendin e Kosovës që mund ta testojë LDK-në.

Edhe deputeti Dardan Molliqaj ka ftuar partitë opozitare për bashkëpunim lidhur me ndërtimin e një platforme të veprimit lidhur me dialogun.