Kurti: Të mos përsëritet konferenca si e Londrës

Për ndarjen ka shkruar edhe Lideri i Vetëvendosjes, Albin Kurti, i cili ka bërë thirrje që të mos përsëritet konferenca si ajo e Londrës.

“Sot, kur nëpër media lexojmë se si pushtetarë të lartë po merren vesh për “kompromise të dhimbshme”, nuk mund të mos kujtojmë historinë tonë. Para 105 vjetësh u përmbyll Konferenca e Ambasadorëve në Londër. Gjatë asaj konference, Fuqitë e mëdha u morën vesh ta ndanin pjesën ballkanase të Perandorisë Otomane mes Serbisë, Bullgarisë, Greqisë e Malit të Zi dhe njëkohësisht i caktuan kufijtë e Shqipërisë, duke lënë jashtë saj gjysmën e trojeve të banuara nga shqiptarët dhe rreth 40% të popullsisë shqiptare”, ka thënë ai, përcjell albinfo.ch.

Kurti ka shkruar se tash është koha që ta ndryshohet ky tipar problematik i politikbërjes.

“Një politikë e vëmendshme ndaj nevojave aktuale e historike të popullit tonë, një politikë bashkëpunuese me intelektualët e moralshëm kombëtarë, që të mos përballemi në të ardhmen me vendime si ato të Konferencës së Londrës, ku vendet tona i ndajnë e i shqepin pa na marrë parasysh”, ka shkruar Kurti.