Grumbullohet një fond për mbështetje të të mbijetuarave të dhunës seksuale nga lufta e fundit në Kosovë

Përmes Platforms online “KosovaIdeas”, kjo fushatë kishte për qëllim të krijojë të paktën 20 mijë euro të cilat do të nevojiten që të hapin një vend pune që do të shërbejë për trajnim dhe punësim

Foto ilustrim

Këtë vit shënohet 20 vjetori që nga lufta e fundit në Kosovë i viteve 1998-1999.

Në shenjë të këtij përvjetori, Qendra Kosovare për Rehabilitimin e të Mbijetuarave të Torturës, OJQ me seli në Prishtinë, ka zhvilluar iniciativën për grumbullimin e fondit prej 20 mijë eurove për të mbështetur të mbijetuarit e dhunës seksuale gjatë luftës në Kosovë.

Pas mbarimit të luftës, të mbijetuarit e dhunës seksuale ende përballen me sfida dhe stigma të ndryshme brenda komuniteteve të tyre.

Përdorimi i dhunimit masiv dhe i formave të tjera të dhunës seksuale gjatë luftës në Kosovë (1998-1999) pati pasoja të mëdha jo vetëm për viktimat , por edhe për familjet dhe komunitetet e tyre.

Në Kosovë, dhuna seksuale e lidhur me luftën (përfshirë përdhunimin) është akoma tabu kulturor dhe stigma e madhe rrethon këto krime.

Rimëkëmbja psikologjike e të mbijetuarve të dhunës seksuale dhe torturës është penguar shumë nga kjo stigmë.

Frika e të mbijetuarve për t’u refuzuar nga familja dhe komuniteti i tyre krijon pengesë për rehabilitimin, qasjen në drejtësi dhe riintegrimin socio-ekonomik.

Ata që përjetuan dhunë seksuale gjatë konfliktit përjetojnë sfida të mëdha në kërkimin e të drejtave për shërbimet rehabilituese, kompenzimin dhe drejtësinë.

Deri më sot asnjë person nuk ka dalë para drejtësisë për të marrë dënime në lidhje me dhunimet e kryera gjatë kohës së luftës.

Sipas Platformës ‘KosovoIdeas’, që nga viti 1999, Qendra Kosovare për Rehabilitimin e Viktimave të Torturës (QKRMT), ka zhvilluar dhe zbatuar programe të fokusuara në mbështetjen e rimëkëmbjes psiko-sociale dhe mjekësore të të mbijetuarve të dhunës seksuale në Kosovë.

“Çdo i/e mbijetuar ka të drejtën për të korrigjuar dhe riparuar!”.

Fushata “Be My Voice” (Bëhu Zëri Im) ka filluar më 26 qershor, dhe synon të rrisë ndërgjegjësimin dhe fondet për dhunën seksuale të luftës, duke luftuar paragjykimet dhe stigmatizimin, dhe promovimin e përfshirjes sociale për të mbijetuarit e dhunës seksuale nga koha e luftës.

Përmes Platforms online “KosovaIdeas”, kjo fushatë kishte për qëllim të krijojë të paktën 20 mijë euro të cilat do të nevojiten që të hapin një vend pune që do të shërbejë për trajnim dhe punësim, ku viktimat e përdhunimit të luftës do të fuqizojnë rolin e tyre brenda familjes dhe shoqërisë me krijimin dhe shitjen e punë doreve.