Eros Grezda realizon ëndrrën, kalon te skuadra e Rangers në Skoci

Eros Grezda është shprehur shumë i lumtur me kalimin në Skoci te Glasgow Rangers

Anësori shqiptar, Eros Grezda ka bërë një hap të madh në karrierën e tij, duke nënshkruar me skuadrën e madhe skoceze, Rangers.

Ai ka nënshkruar kontratë katër vjeçare, duke u larguar nga kampionati kroat, përcjell albinfo.ch.

“Është një përvojë e pabesueshme për mua. Unë kam ëndërruar që fëmijë që të luaj me një klub të madh, i mbështetur nga shumë tifozë. Nuk mund të shkonte më mirë për mua se sa tani që jam këtu. Pres me padurim të luaj para tifozëve. Mendoj se ishte koha e duhur për mua, që në moshën 23-vjeçare, të kaloj në një ligë kaq të mirë dhe në një klub të madh si Rangers. Ky është një hap i madh në karrierën time”, ka thënë i emocionuar Grezda.

Ai shton se mezi pret të luajë në skuadrën e re. “Jam shumë i lumtur që jam këtu. Kjo është hera e parë që zbres në një stadium të zbrazët, është një ndjenjë tjetër, është ende e pabesueshme. Unë pres me padurim të luaj ndeshje zyrtare me tifozët. Klubi dhe tifozët presin shumë që unë të jap maksimumin tim. Unë jam një lojtar i shpejtë dhe unë do të mundohem të shënoj gola, kështu shpresoj të shënoj golat e fitoreve këtu”, ka theksuar mesfushori i Kombëtares shqiptare.

Ai do të jetë nën urdhrat e Steven Gerrard, i cili në këtë afat kalimtar ka sjellë 14 lojtarë të rinj.

---