KFOR-i gjerman i dhuron FSK-së 44 automjete

Gjenerali Uwe Becker deklaroi se ndihet i privilegjuar që në emër të ministrisë gjermane ndau një donacion të tillë, duke thënë se tash ka ardhur koha që të zvogëlohet numri i personelit gjerman.

 

KFOR-i gjerman në Kosovë i ka dhuruar sot Forcës së Sigurisë së Kosovës pajisje me vlerë prej 1.6 milion euro, nga to 44 automjete të tipit “Wolf” si dhe 77 komplete me vegla speciale. Gjenerali Uwe Becker deklaroi se ndihet i privilegjuar që në emër të ministrisë gjermane ndau një donacion të tillë, duke thënë se tash ka ardhur koha që të zvogëlohet numri i personelit gjerman.

”Tash duhet t’u kalojë përgjegjësia institucioneve të Kosovës për të mbrojtur paqen dhe stabilitetin. Ka shumë shembuj të shkëlqyeshëm të shërbimit të FSK-së”, ka thënë ai.

Ndërsa komandanti i FSK-së, Rrahman Rama, ka thënë se forca është në prag të tranzicionit dhe kjo ndihmë do të hapë mundësi të reja.

“Tani vjen një donacion me 44 automjete. Është shumë i rëndësishëm për zhvillimin e aftësive. Automjetet do të jenë në funksion të rritjes së mobilitetit të FSK-së në kryerjen e detyrave tona”, përfundoi Rama.

---