Cili është skenari i kualifikimit të Shqipërisë

Kuqezinjtë duhet një mrekulli për të dalë në vendin e parë në Grupin 1 të Ligës C të Ligës së Kombeve

Humbja e Shqipërisë 2:0 kundër Izraelit i ka minimizuar shanset për ta mbyllur Grupin 1 të Ligës C në vendin e parë.

Gjithsesi, ekziston një mundësi matematike, me një përqindje shumë të ulët që të ndodhë, që kuqezinjtë të lënë pas në renditje si Izraelin ashtu edhe Skocinë.

Dhe në bazë të këtij skenari, të tria skuadrat duhet ta mbyllin grupin me pikë të barabarta, nga 6. Në këtë rast do të hynte në punë golaverazhi, shkruajnë mediat shqiptare.

Shqipëria duhet patjetër të fitojë me diferencë të thellë golash me Skocinë, 4:0, dhe Skocia të triumfojë 1:0 (2:0 ose 3:0) ndaj Izraelit, që kuqezinjtë të kualifikohen tutje.

Në këtë rast, golaverazhi i Shqipërisë do të ishte pozitiv, 5/4, i Izraelit 4/3 (4/4 ose 4/5),  dhe i Skocisë 4/6, (5/6 ose 6/6).

Kriteri që do të favorizonte Shqipërinë ndaj Izraelit do të ishte numri i përgjithshëm i golave të shënuar (pikët do të ishin të barabarta me Izraelin, 6, diferenca e golave e njëjtë, +1).

Çdo fitore e Skocisë me diferencë 4 ose më shumë gola ndaj Izraelit, do ta bënte të pavlefshëm suksesin hipotetik 4:0 të kuqezinjve ndaj Skocisë. Në kë rast do të kualifikoheshin skocezët.

---