Jepet premiera e sezonit të fundit të serisë “House of Cards”

Seriali televiziv “House of Cards” ka shënuar premierën e sezonit final. Kjo premierë erdhi pothuajse një vit pasi që aktori në rolin kryesor, Kevin Spacey, u akuzua për ngacmim seksual. Në premierën e serialit, aktorja Robin Wright tregoi për atmosferën kur ishte në prag të anulimit, pikërisht pas këtij skandali.

“Ne të gjithë e dinim se kishim shumë punë për të bërë, për ta rikthyer sezonin e fundit të serialit. Autorët e tij veçse kishin shkrimet, duhej vetëm t’i ndryshonim paksa dhe neve nuk na mbeti gjë tjetër vetëm të mos dorëzohemi, të harrojmë se çka ka ndodhur dhe ta përfundojmë atë”, deklaroi Wright.

Ajo, gjithashtu ,shtoi se kanë kaluar gjashtë vjet dhe të gjithë janë bërë si një familje dhe kanë qenë të përkushtuar për ta bërë këtë serial më të mirë sesa duhej. Aktori Frank Cecil ishte njëri prej të pranishmëve në premierë, por nuk u ndal te skandali.

“Përfundimi i serialit ishte i domosdoshëm, ndërsa sa i përket “atij”, Kevinit, nuk e di, shpresoj që të marrë ndihmë”, tha aktori.

Ndërsa, aktorja Constance Zimmer, e përshkruajti si të frikshme dhe të mërzitshme kohën kur seriali ishte në prag të anulimit. Sezoni i fundit i këtij seriali do t’i ketë vetëm 8 episode dhe nis së shfaquri nga dy nëntori.