Kosova ka nevojë për 13 ministri, e jo 21

Nga 21 në 13 ministri ka propozuar Instituti GAP që të ulet numri i tyre në Kabinetin Qeveritar, në mënyrë që të ulen edhe shpenzimet nga buxheti i shtetit.

Këto vlerësime janë bërë me rastin e publikimit të raportit për buxhetin e këtij viti që e ka bërë Instituti GAP, përcjell albinfo.ch.

“Sipas përllogaritjeve tona, nga kjo ulje e numrit të ministrive vetëm nga shpenzimet e pagave, telefonisë mobile dhe drekave, buxhetit të Kosovës do t’i kurseheshin rreth 3.2 milionë euro në vit, apo 12.9 milionë euro për një mandat qeverisës prej katër vjetësh”, thuhet në raport. Sa i përket zhvillimit të tregut dhe arsimit, shpenzimet në arsim dhe hulumtime mbesin ndër më të ulëtat në rajon, vlerëson GAP-i.