Xhaka flet për rolin e tij në fushë

Taulant Xhaka po luan si qendërmbrojtës në ndeshjet e fundit për skuadrën zvicerane, Basel

Baseli nuk ka shkëlqimin e dikurshëm, derisa të shtunën pësoi nga Thun me rezultat 4:2.

Në këto ndeshje titullar i padiskutueshëm është Taulant Xhaka, por me një rol të ri në fushë, si qendërmbrojtës, përcjell albinfo.ch.

“Më shumë më pëlqen të luaj në mesfushë. Është e qartë që të qenurit një mesfushor është pozicioni im i preferuar. Por, edhe mbrojtës qendre ka disa përparësi”, është shprehur futbollisti kuqezi.

Ai bën edhe krahasimin mes qendërmbrojtësit dhe mesfushorit. “Tani vrapoj më pak (qesh)! Jo, seriozisht. Është përsëri një pozicion në qendër. Si një mbrojtës qendre ke përparësinë se e shikon të gjithë fushën dhe mund ta kontrollosh atë. Ndërsa në mesfushë ke presion nga të gjitha krahët. Një humbje e topit në atë pozicion mund të sjellë një kundërsulm”, ka shtuar tutje futbollisti shqiptar.

Ai është ftuar për Shqipërinë për ndeshjen ndaj Skocisë në Ligën e Kombeve dhe miqësoren me Uellsin.

Xhaka ishte ndër futbollistët më të mirë në fushë për kuqezinjtë në humbjen 2:0 nga Izraeli, derisa në takimin në Elbasan kishte shënuar golin e vetëm në këtë ndeshje, që ishte edhe goli i tij i parë me Shqipërinë.

---