Çdo ditë largohet nga një mjek nga Kosova

Kryetari i Federatës Sindikale të Shëndetësisë të Kosovës, Blerim Syla, tha se muaji janar do t’i gjejë mjekët me revoltë të përgjithshme.

“Na vjen keq prej pacientëve dhe qytetarëve të Kosovës, neve po na neglizhojnë institucionet e Kosovës. Me datën 20 të këtij muaji mbahet Këshilli i sindikatës. Nuk shkon më kështu”, është shprehur Syla sot në një intervistë për RTK.

Sipas tij, deri më tani 110 kërkesa janë për të dalë në shtetet e jashtme. “Nëse në Gjermani kalon ligji për emigracionin, lehtësohen procedurat për të punuar në Gjermani. Nuk e di, do të ndodhë Shqipëria këtu. Nga Shqipëria kanë ikur shumë mjekë e infermierë”, tha ai.

Syla bëri me dije se për çdo ditë po na ik nga një mjek nga Kosova. “Edhe në vendet e rajonit ka krizë të mjekëve”, tha ai, përcjell albinfo.ch.

Kryetari i Federatës Sindikale të Shëndetësisë, Blerim Syla, ka kërkuar përmirësim të kushteve për mjekët. “Kërkojmë investime në kushtet e punës, kërkojmë dinjitet të mjekut”, deklaroi ai.