Pacolli: Serbia përdori edhe gratë kundër Kosovës në Interpol

Ministri i Jashtëm i Kosovës, Behgjet Pacolli, më në fund, është paraqitur në Komisionin për Punë të Jashtme, madje para se në mbledhje të arrinin edhe vetë deputetët e Komisionit.

Ai ka thënë se gjithnjë vjen para Komisionit, ndonëse disa herë është shtyrë ky raportim për njohjet, pikërisht për shkak të mungesës së tij.

“Në seancën parlamentare kam refuzuar të vij, sepse kam qenë nervoz, kam pasur frikë se dikush mund të më fyejë edhe atëherë unë do të isha larguar nga atje. Unë nuk e ngacmoj askënd dhe nuk lejoj të më ngacmojë dikush”, ka thënë Pacolli.

Ministri i Jashtëm, Pacolli, thotë se Kosova, prej shtatorit të vitit të kaluar, ka harxhuar më pak se 3 milionë euro për lobim, në krahasim me 30 milionë euro që ka shpenzuar Serbia vetëm për këtë çështje. Komisioni nuk e ka miratuar kërkesën e tij që çështja e Interpolit të mbahet me dyer të mbyllura. Ministri ka thënë se ai nuk flet për Interpolin në prani të medieve.

“Nuk e ndjej obligim të flas këtu”, ka thënë Pacolli, i cili ka shtuar se do ta dërgojë raportin në formë konfidenciale për komisionin, raportin për lobimin e Interpolit dhe atë për njohjet.

Sidoqoftë, duke folur për Interpolin, ai ka thënë se Kosova është tradhtuar nga disa shtete por që, sipas tij, Serbia ka përdorur metoda jo të pastra duke përdorur gra të bukura për t’ua ndryshuar mendjen disa delegacioneve të shteteve nga Afrika. Pacolli, po ashtu, ka thënë se Kosova nuk ka hequr dorë dhe do të aplikojë sërish për anëtarësim në Interpol.