Albian Ajeti tregon pse zgjodhi Zvicrën para Shqipërisë

Ai flet edhe për familjen që është shumë i lidhur, derisa nga gatimet i pëlqen gjithçka nga nëna e tij

Një nga sulmuesit më të mirë shqiptar padyshim është Albian Ajeti. Ai në një intervistë të gjatë për ‘Blick’, ka treguar për zgjedhjen e tij me kombëtare, familjen, pushimet dhe synimet, përcjell albinfo.ch.

“Shqipëria është familja ime, megjithëse zgjodha të luaja për Zvicrën, mendoj se ishte vendimi më i drejtë”, është shprehur Albiani.

Edhe dy vëllezërit e tij janë futbollistë të njohur. “Adionisi, vëllai binjak po luan me Chiasson tani, ai ka vuajtur shumë dhe ka luftuar shumë që të jetë pjesë e futbollit për shkak të dëmtimeve. Ndërsa vëllai i madh, Arlindi, u kthye nga Italia dhe tani luan për Grasshoppers. Jam shumë i lidhur me ta”, theksoi tutje sulmuesi i Baselit, i cili gjithashtu ka shënuar me Zvicrën.

Për të familja është shumë e rëndësishme. “Nëna do të thotë gjithçka për mua, nuk mund të rri pa folur me të çdo ditë. Dhe me babin kam një kontakt të ngushtë, ashtu si me nënën, atë e kam si mik edhe pse shumicën e rasteve është i pari që më kritikon”, shtoi tutje sulmuesi i njohur shqiptar.

Ai shtoi se i vjen keq për situatën me Baselin, dhe që nuk arritën sukses në garat ndërkombëtare, derisa ka theksuar se si lojtar është rritur shumë.

Ajeti ishte shpallur shënuesi më i mirë i kampionatit të kaluar dhe për këtë ka falënderuar shokët e skuadrës.

“Ushqimi i preferuar është gjithçka që gatuan nëna ime. Nuk jam i dashuruar për momentin, ndoshta për Krishtlindje ose vitin e ardhshëm, është në dorën time”, ka thënë mes të qeshurave Albiani.

---