Ky qytet në Kosovë dëshiron mbylljen e basteve

Kryetari i komunës, Agim Aliu thotë se do t’i kërkojë Qeverisë së Kosovës mbylljen e të gjitha lojërave të fatit dhe salloneve të masazhit në zonë

Shembullin e Shqipërisë për mbylljen e basteve dhe kazinove mund ta ndjekë edhe një qytet në Kosovë. Nëntë pika bastesh u mbyllën përpara një jave në Ferizaj, pas një aksioni të ndërmarrë nga Inspektoriati i kësaj komune në bashkëpunim me policinë.

Në shpjegimet e dhëna theksohej se, shumica e këtyre aktiviteteve nuk zotëronin një certifikatë biznesi dhe as kushtet minimale teknike për zhvillimin e veprimtarisë.

Kryetari i komunës, Agim Aliu thotë se do t’i kërkojë Qeverisë së Kosovës mbylljen e të gjitha lojërave të fatit dhe salloneve të masazhit në zonë.

“Vërtet do të duhej që edhe vet qeveria të reflektonte mbi ligjin e lojërave të fatit. Unë do t’i kisha mbyllur të gjitha pikat e basteve dhe kazinotë kudo që janë, por veçanërisht në Ferizaj”, është shprehur Agim Aliu, përcjell albinfo.ch.

Aliu është angazhuar me kohë për atë që e cilëson si “tolerancë zero” ndaj bizneseve që favorizojnë çdo dite informalitetin fiskal dhe rrezikojnë mirëqenien e qytetarëve.

---