Aktori Spacey deklarohet i pafajshëm

Ish-ylli i serisë “House of Cards”, Kevin Spacey, e ndoqi një seancë dëgjimore të hënën në gjykatën e Nantucket, ku po akuzohet për ngacmim seksual të një 18-vjeçari, ngjarje kjo që besohet të ketë ndodhur para më shumë se dy vjetësh. Aktori u deklarua i pafajshëm ndaj akuzave, derisa gjykatësi i caktuar në këtë rast e detyroi djaloshin në fjalë që t’i sigurojë të gjitha të dhënat nga telefoni i tij personal, të asaj kohe kur supozohet se ka ndodhur incidenti.

Spacey nuk e tha asnjë fjalë në gjykatën e Nantucket rreth incidentit ku ai akuzohet për ngacmim seksual. Por, megjithatë, avokati i tij ia dorëzoi gjykatës dokumentin, përmes të cilit aktori deklarohet i pafajshëm ndaj akuzave, përcjell, albinfo.ch

Madje, ai i kërkoi gjykatësit që viktima e supozuar t’ia dorëzojë gjykatës të gjitha të dhënat e telefonit të tij personal, duke datuar gjashtë muaj para 7 korrikut të 2016-s, kur besohet se ka ndodhur rasti.

Sipas avokatit të aktorit Spacey, djaloshi i cili atëkohë ishte 18-vjeçar, ka shkëmbyer mesazhe të shumta dhe video në Snapchat me të dashurën e tij, duke i treguar se është takuar me aktorin e njohur hollywoodian në lokalin “Club Car”, dhe se asnjëherë nuk ka e përmendur ndonjë ngacmim seksual nga ana e Spaceyt. Aktori mund të dënohet deri në pesë vjet burgim nëse shpallet fajtor ndaj akuzave të ngritura kundër tij.