Rritet çmimi i bukës në Kosovë 

Me hyrjen në fuqi të taksës për mallrat nga Serbia dhe Bosnja, prodhuesit e bukës në Kosovë kanë filluar rritjen e çmimit të saj, nga 30 në 40 centë, të cilën ata po e arsyetojnë me shtrenjtimin e miellit.

Drejtori ekzekutiv i Shoqatës së Mullisëve të Kosovës, Muhamet Farizi, tha për Radio Kosovën se ngritja e çmimit të bukës në Kosovë ka ndodhur edhe kur ka pasur rezerva të mëdha të grurit. Sipas tij, rritjen e çmimit po e bëjnë furrtarët për përfitime të veta.

“Çmimi i bukës në Kosovë në përgjithësi ka pasur lëvizje edhe me herët, posaçërisht ngritje të çmimit ka pasur në kohën kur s’ka pasur furnizim të mjaftueshëm, por edhe kur ka pasur furnizim të tepruar. Kemi pasur raste kur çmimi i miellit ka qenë tejet i ulët, por çmimin e bukës furrtarët nuk e kanë ulur, e kanë shfrytëzuar për përfitime të veta”, ka thënë Farizi.

Ndërsa Ilhami Ismajli, zëdhënës në Ministrinë e Tregtisë dhe Industrisë, nëpërmjet telefonit tha se furrtarët mund ta ngritin çmimin e bukës dhe se kjo është çështje e tyre.