‪Rihanna e padit babanë‬

Rihanna e ka paditur babanë e saj për përfitime nga brendi i krijuar sipas emrit të saj “Fenty”. 

Sipas këngëtares dhe aktores së njohur, babai i saj e ka krijuar një biznes në vitin 2017, i cili pa leje promovohet nga emri i saj.

Këngëtarja e hitit “Diamonds”, emri i së cilës është Robyn Rihanna Fenty, ngriti një padi në Gjykatën Federale të Los Anxhelosit, duke e akuzuar Ronald Fentyn dhe dy partnerët e tij të biznesit për mashtrim dhe reklama të rreme përmes kompanisë së tij të prodhimit dhe talenteve, “Fenty Entertainment”.

Ylli i lindur në Barbados, që e shfrytëzon markën “Fenty” për të shitur produkte kozmetike, rroba të brendshme dhe atlete, i ka kërkuar gjykatës një urdhër ndalim, i cili ia pamundëson babait të saj ta keqpërdorë emrin e brendit ‘Fenty’, si dhe ka kërkuar dëmshpërblim të një shume të pacaktuar të të hollave.

Sipas aktpadisë, bëhet e ditur se Ronald Fenty, edhe pse vazhdimisht i ishte thënë se nuk ka autoritet për ta përdorur emrin e së bijës, brendin e saj apo të flasë në emër të Rihannas, bashkë me partnerët e tij të biznesit kanë vazhduar ta falsifikojnë lidhjen me këngëtaren e njohur botërore.