Komisioni nuk e miraton statutin e Trepçës  

Komisioni për Zhvillim Ekonomik, Infrastrukturë, Tregti, Industri dhe Zhvillim Rajonal i Kuvendit të Kosovës ka vendosur që ta kthejë prapa projekt-statutin e Trepçës, pas vërejtjeve që dhanë deputetët e këtij komisioni.

Në komision u vendos që raporti i Panelit për zgjedhjen e Bordit të KOSTT t’i kalojë Kuvendit që të zgjedhë 6 anëtarë, nga 12 sa janë në listën e ngushtë.

Anëtarët e këtij komisioni kanë kërkuar që Bordi të përfshijë kërkesat e Sindikatës, për të cilat është arritur marrëveshje mes Sindikatës dhe Qeverisë, përcjell albinfo.ch

Deputeti Liburn Aliu nga Lëvizja Vetëvendosje ka thënë se statuti që është sjellë është i njëjtë me atë të herës së kaluar. Ai ka kërkuar që Bordi ta sjellë statut që Kuvendi e miraton. Deputetja Hykmete Bajrami nga LDK-ja ka thënë se draft-statuti duhet bërë nga aksionarët dhe vetëm atëherë mund ta votojnë. Deputeti Dardan Sejdiu nga PSD ka thënë se nuk duhet të përsëriten gabimi me statut, ashtu siç është gabuar me ligjin për Trepçën. Edhe deputet nga partitë në pushtet kërkuan nga Bordi që ta miratojë statutin e ri.